Mazhoranca ka miratuar sot me 75 vota dekretin e Presidentit për shkarkimin e Fatmir Xhafajt nga posti i Ministrit të Brendshëm. Në unanimitet votash, mazhoranca e shkarkoi atë sot zyrtarisht nga posti i ministrit, ndërsa ra në sy se pjesë e këtij procesi votimi ishte edhe vetë Fatmir Xhafaj.
Xhafaj ishte ulur në karrigen në fund të Kuvendit, teksa ka votuar i qeshur shkarkimin e tij.
Votimi erdhi pas fjalës që kryeministri Rama mbajti në Kuvend, ku deklaroi se prej të shtunës, me presidentin Meta ka një problem. Bëhet fjalë për mosdekretimin nga Meta të gjeneral Sandër Lleshit, në postin e Ministrit të Brendshëm.
Si për ironi të fatit, një vit më parë, në të njëjtën situatë ishte edhe paraardhësi i tij, Saimir Tahiri, i cili ishte ulur në të njëjtën karrige ku u ul sot Fatmir Xhafaj, seancën kur u votua për shkarkimin e tij si ministër.
Kryeministri Rama ka thënë sot se Ilir Meta ka ende kohë të ndryshojë mendje për Sandër Lleshin, edhe pse tashmë afati ligjor ka skaduar. Duke komentuar fjalët e njerëzve të Metës, se ky i fundit po e sfidon, tha se nuk do të donte ta besonte këtë, pasi nuk mund ta pranojë një president qesharak.
