Mëngjesin e sotëm një avion civil ukrainas u rrëzua vetëm pak minuta pasi ishte ngritur nga një aeroport i Teheranit. Sipas informacioneve të bëra të ditura, nga rrëzimi i avionit humbën jetën 176 persona. Deri tani autoritetet kanë raportuar se asnjë nuk ka mbijetuar nga përplasja e fortë. Dyshimet ishin për një defekt në një nga motorët kryesorë të avionit.
Pas incidentit, Ambasada Ukrainase në Teheran reagoi duke përjashtuar mundësinë që avioni të ishte rrëzuar si pasojë e ndonjë sulmi terrorist apo sulmi me raketa.
Sakaq, vetëm pak minuta më herët, mediat ndërkombëtare bëjnë me dije se Ukraina ka ndryshuar qëndrimin zyrtar për ngjarjen. Shkak janë bërë “Kutitë e Zeza”. Kjo pajisje është kujtesa e avionit për veprimet e avionit, manovrat dhe gjendjen e avionit. Mësohet se Irani ka refuzuar t’i dorëzojë “pajisjet” për hetime të mëtejshme nga autoritetet ukrainase, duke qenë se avioni ishte në pronësi të tyre.
“Informacionet rreth asaj se çfarë mund të ketë shkaktuar rrëzimin e aeroplanit po sqarohen nga Komisioni. Çfarëdo deklarate që flet lidhur me shkaqet e aksidenti përpara vendimit të komisionit nuk është zyrtar”, thuhet në deklaratën e re të autoriteteve ukrainase.
Deklarata e parë që ishte publikuar në faqen e Ambasadës së Ukrainës është fshirë.
