Një tifoz futbolli dyshohet se u qëllua për vdekje nga forcat e sigurisë së regjimit islamik mbrëmë, pasi ai festoi humbjen e Iranit ndaj SHBA-së në Kupën e Botës. Mehran Samak, 27 vjeç, thuhet se u qëllua në kokë në qytetin e Anzali, në Iranin lindor, nga agjentët e qeverisë pasi ai i ra borisë së makinës së tij për të festuar humbjen 1-0 të ekipit kombëtar iranian.
Samak ishte ulur në makinën e tij pranë të fejuarës së tij, kur një pjesëtar i forcave të sigurisë së Iranit iu afrua makinës së tyre dhe e qëlloi tifozin e futbollit me një plumb në kokë, raporton Iran International. Ai u dërgua me urgjencë në spital, por ndërroi jetë brenda një ore.
Samak ishte bashkuar me dhjetëra iranianë të tjerë në të gjithë vendin, të cilët festuan humbjen e ekipit kombëtar ndaj Shteteve të Bashkuara, mes zemërimit në rritje kundër regjimit islamik. Shumë e panë rezultatin e ndeshjes si një fitore kundër qeverisë iraniane, e cila ka shtypur protestat mbarëkombëtare që kanë përfshirë Republikën Islamike për muaj të tërë.
Në rajonin kurd të Iranit, tifozët e futbollit ndezën fishekzjarre dhe u binin borive të makinave herët të mërkurën për të festuar humbjen e ekipit iranian.
Disa bërtisnin “Vdekje diktatorit”, një slogan popullor proteste që i referohej liderit suprem të Iranit, Ajatollah Ali Khamenei.
Rajoni perëndimor kurd i vendit ka parë protesta veçanërisht intensive, dhe një goditje vdekjeprurëse nga forcat e sigurisë, ku janë vrarë të paktën 300 njerëz.
Protestat shpërthyen fillimisht në shtator, pas vdekjes së një gruaje të re kurde, Mahsa Amini, në paraburgimin e policisë morale të Iranit në kryeqytetin e Teheranit. 22-vjeçarja vdiq tre ditë pas arrestimit të saj në Teheran për shkeljen e dyshuar të kodit islam të veshjes për gratë.
Protestat u shndërruan shpejt në sfidën më serioze ndaj teokracisë së Iranit, që nga themelimi i saj në Revolucionin Islamik të vitit 1979. Autoritetet iraniane kanë fajësuar aktorë të huaj, kryesisht SHBA, për orkestrimin e lëvizjes së protestës, por nuk kanë dhënë asnjë provë.
Mbrëmjen e së martës, Kombëtarja e Iranit humbi 1-0 nga Shtetet e Bashkuara. Lojtarët iranianë ishin të kujdesshëm për të kënduar himnin e tyre kombëtar para ndeshjes, pasi u paralajmëruan nga zyrtarët në Teheran se ata përballen me ndëshkim për vendimin e tyre ‘fyes’ për të mos e kënduar atë përpara ndeshjes. Një politikan iranian paralajmëroi se ata mund të ndëshkohen nëse nuk do të fillojnë të këndojnë himnin për dy ndeshjet e tyre të fundit, kundër Uellsit dhe Shteteve të Bashkuara.
Burimi i lajmit: dailymail. Përshtatur nga Tirana Today
