Për gazetarin Blendi Fevziu, nëse kryeministri Rama do kishte vendosur që të mos ta mbronte kryedemokratin Basha, atëherë do t’i kishte rënë selia. Blendi Fevziu, i ftuar në emisionin “Të Paekspozuarit” në MCN TV, ka folur për përplasjen e fortë Berisha-Basha në 8 janar në selinë e PD, dhe ngjarjet në këtë parti.
Fevziu tha se ky konflikt, “u zgjidh” nga një palë e tretë, që ishte policia. “Dy forca, gjejnë një pikë të përbashkët që të mund të demonstrojnë forcën. Luftërat e mëdha zhvillohen edhe si provë force.
Prova e forcës nuk pati protagonist palët, por një të tretë, që ishte policia. Pala e tretë e zgjidhi konfliktin. U fut një faktor i tretë vendimtar për opozitën, që është shteti. Deri tani shteti ishte tërhequr mënjanë. Befas u bë prova e forcës. Shteti po njeh për partner Bashën deri në këto momente. Megjithatë ai vendosi ta blindojë selinë.
Në momentin që blindoi partinë, kontestuesit e tij, që ishin në dijeni të blindimit, tentuan ta marrin dhe të hyjnë aty. Diçka nuk ka funksionuar në mënyrën se si vajtën ta merrnin. Pas hyrjes së protestuesve, ndërhyri policia. Në këtë moment, shteti mori një pozicion, që njeh zyrtarisht si kryetar të PD, Lulzim Bashën. Problemi më i madh i opozitës është se përcaktimin e saj do ta bëjë shteti sot, pra qeveria.
Nëse Edi Rama vendoste të mos ta mbronte Bashën, do t’i kishte rënë selia. Nëse kundërshtarët hyjnë edhe sot, ai shkon me një bombol gazi dhe i nxjerr jashtë. Është e trishtë sepse sot duhet të pyesësh Ramën për opozitën“, tha Fevziu.
Sipas tij, është është e qartë që kryeministri Edi Rama mbështet hapur Lulzim Bashën, dhe interesi është që kreu i PD të jetë i forti në partinë e dobët, në mënyrë që të mos fitojë në zgjedhje.
“Rama padyshim mbështet Lulzim Bashën në këtë betejë brenda PD. Interesi i Ramës është që Basha të jetë kryetar. Nëse opozita i mbetet Bashës, do të çahet kjo parti. Ai do Lulzim Bashën të fortë brenda partisë së dobët. Ai do që Basha të mos largohet, por as mos të fitojë. Rama mendon që e çan PD dhe të krijojë potencialin për bashkëpunim brenda parlamentit”, u shpreh Fevziu.
