Komisioni Evropian ka përshëndetur progresin në përafrimin e legjislacionit sidomos paketën ligjore në fushën e turizmit dhe ka inkurajuar autoritetet e Tiranës që të miratojnë Strategjinë e Turizmit.
Procesi i Berlinit – Monitorim për krijimin e Zonës Ekonomike Rajonale
Një zhvillim shumë i mirëpritur nga Komisioni Evropian është ngritja nga qeveria e Tiranës e një mekanizmi për monitorimin e Zonës Ekonomike Rajonale (REA – Regional Economic Area). Krijimi i kësaj zone është projekti madhor rajonal i Procesit të Berlinit, për të cilin u ra dakord mes 6 vendeve të Ballkanit Perëndimor në Samitin e Triestes, i katërti në serinë e samiteve të procesit në fjalë.
Johannes Hahn, Komisioneri i BE për Politikat e Zgjerimit dhe të Fqinjësisë së Mirë e ka vlerësuar krijimin e Zonës Ekonomike Rajonale “prioritet kyç për të nxitur rritjen ekonomike dhe punësimin ne Ballkanin Perëndimor pasi ekonomia është e para për të sjellë progres në procesin e integrimit evropian të Ballkanit Perëndimor.”
Krijimi i Zonës Ekonomike Rajonale konsiderohet si një bazë për hyrjen e rajonit në BE dhe heqjen e të gjitha pengesave për vendosjen e një hapësire të vetme ekonomike me synimin e integrimit në tregun e brendshëm të BE për një periudhë afatgjatë.
Negociatat e anëtarësimit, reforma në drejtësi dhe opozita
Shqipëria shpreson të hapë negociatat e anëtarësimit me BE në 6 mujorin e parë të këtij viti. Përveç përafrimit të legjislacionit në të gjitha fushat me acquis communautaire hapja e tyre kushtëzohet nga rezultatet konkrete dhe të qëndrueshme të zbatimit të reformës në drejtësi.
Opozita e djathtë, e kryesuar nga PD, kundërshton emërimin e prokurores së Përgjithshme të Përkohshme, Arta Marku dhe e konsideron atë antikushtetuese, kurse mazhoranca qeverisëse e quan të ligjshme dhe në linjë me ecurinë e reformës në drejtësi.
Opozita ka paralajmëruar një valë protestash në të gjithë vendin që hapen javës që vjen, më 27 janar, me protestën përballë godinës së kryeministrisë kundër asaj që opozita e quan” paligjshmëri të qeverisë”.
Ngritja e Këshillit të Lartë të Prokurorisë, një nga strukturat e Reformës në Drejtësi, e parashikuar në Kushtetutë por e vonuar një vit për shkak të mosmarrëveshjeve mazhorancë –opozitë, pritet të emërojë edhe Prokurorin e Përgjithshëm me një mandat 7 vjeçar. Deutsche Welle
