Të paktën 56 persona kanë vdekur, pas një tërmeti me magnitudë 5.6 ballë që goditi provincën Java Perëndimore të Indonezisë të hënën, sipas guvernatorit të saj. Më shumë se 700 persona u plagosën gjithashtu, tha Guvernatori i Java-s Perëndimore, Ridwan Kamil. “Ka ende shumë banorë të bllokuar në vendet e incidentit”, tha Kamil.
Tërmeti goditi rajonin Cianjur në Java Perëndimore, në një thellësi prej 10 kilometrash (6.2 milje), sipas Shërbimit Gjeologjik të Shteteve të Bashkuara (USGS).
Katër shkolla dhe 52 shtëpi u shembën ose u dëmtuan rëndë, sipas zyrës lokale të Agjencisë Kombëtare për Menaxhimin e Fatkeqësive (BNPB). Një xhami dhe një spital u dëmtuan gjithashtu, sipas agjencisë.
BNPB tha se nuk ekziston rreziku i një cunami, raportoi “Reuters”. Herman Suherman, një zyrtar qeveritar në Cianjur, tha për mediat se disa banorë ishin bllokuar në rrënojat e ndërtesave të shembura. Kanali i lajmeve “Metro TV” tregoi atë që dukej se ishin qindra persona që po trajtoheshin në një parking spitali.
Një shkollë me konvikt islamik ishte dëmtuar gjithashtu, ndërsa komunikimet ishin ndërprerë për shkak të ndërprerjeve të energjisë.
Pamjet televizive treguan banorët të grumbulluar jashtë ndërtesave pothuajse të kthyera në rrënoja, sipas “Reuters”. Një person i quajtur Muchlis, tha se ndjeu “një dridhje të madhe” dhe muret dhe tavani i zyrës së tij u dëmtuan.
“Isha shumë i tronditur. Isha i shqetësuar se do të kishte një tërmet tjetër,” tha Muchlis për “Metro TV”.
BMKG tha se paralajmëroi për një rrezik rrëshqitjesh dheu, veçanërisht në rast shiu të dendur, pasi 25 pasgoditje u regjistruan në dy orët pas tërmetit.
Burimi i lajmit: CNN. Pështatur nga Tirana Today
