India po kalon një situate tepër të vështirë epidemiologjike, teksa varinati i koronavirusit me tre mutacione ka shkaktuar një rritje tejet të lartë të viktimave dhe infektimeve.
Për këtë arsye, Organizata Botërore e Shëndetësisë e cilësoi variantin B.1.617, si një rrezik global për shëndetin.
Vala shkatërruese ka mbingarkuar sistemin e kujdesit shëndetësor, ndërsa ekspertët thonë se shifrat zyrtare për rastet dhe viktimat janë shumë më të ulëta sesa shifrat reale.
Megjithatë, indianët po përdorin një tjetër mënyrë për të luftuar koronavirusin, përveç vaksinimit masiv të popullsisë, duke përdorur bajgën e lopës.
Sipas tyre, lyerja e trupit me bajgën e lopes mund të parandalojë infektimin me virusin vdekjeprurës, por kjo është kundërshtuar nga mjekët vendas, shkruan agjencia e lajmeve, Reuters.
Ata janë shprehur se nuk ka asnjë provë shkencore që kjo është efektive, madje mund të jetë burim për sëmundje të tjera.
Pandemia ka ulur në gjunjë shtetin me popullsinë e dytë më të madhe në botë, që regjistron 22,66 milionë raste dhe 246 116 viktima deri tani.
Ekspertët thonë se shifrat reale mund të jenë deri 10-fish më të larta, ndërkohë që në të gjithë vendin është shumë e vështirë të gjesh një shtrat në spital, e madje edhe oksigjen apo mjekime.
