Në Kuvend është diskutuar sot raporti i Komisionit Hetimor për inceneratorët. Kreu i demokratëve, Lulzim Basha, tha nga foltorja se këmbëngulja e demokratëve do të shkojë deri në fund. Po sipas tij, shumë shpejt “topi do të jetë tek SPAK” dhe se këtu është mundësia që të jepet prova e parë e Prokurorisë së Posaçme.
Sakaq, zv.kryeministri Arben Ahmetaj tha se deri në 2013, Shqipëria ishte një mal plehrash. Sipas Ahmetajt, shuma e paguar nga shteti ka qenë vetëm 55 mln euro, ndërsa për Tiranën nuk ka marrë mbështetje buxhetore.
“Shqipëria në 2013 ishte katandisur në mal plehrash. Kjo mazhoranca e sotme nisni një pastrim të territorit të ambientit, që nuk ka përfunduar akoma. Impiantet janë aty dhe vazhdojnë të punojnë.
E pavërteta më e madhe, shifra se janë vjedhur 430 mln euro. Shuma e paguar nga buxheti i shtetit është 55 mln euro, e faktuar nga ato që kanë dalë nga Thesari i Shtetit. Koncesioni i Tiranës nuk ka pasur nevojë për mbështetje buxhetore.
Qeveria ka bërë transferta në mbështetje të Bashkisë së Tiranës, për menaxhimin e mbetjeve. Ju kuptoj kur godisni politikisht, prisnit të shkrihej mazhoranca, por nuk ndodhi. Unë mezi prisja atë Komision që të thotë të vërtetën siç është”, u shpreh Ahmetaj.
