Në kuadër të masave të marra kundër ndotjes së ajrit nga shkarkimet e mjeteve motorike, Qeveria ka dalë sot me një ndryshim të vendimit të miratuar më herët, duke shtyrë afatin e përcaktuar për import.
Me anë të një deklarate për mediat, Ministrja e Infrastrukturës dhe Ekonomisë, Belinda Balluku, tha se qeveria ka vendosur shtyrjen e afatit të hyrjes së fuqi, nga data 28 shkurt 2019, që ishte më parë, në 31 dhjetor 2019.
“Ministria e Infrastrukturës shqyrtoi pretendimet e grupeve të interesit, duke vlerësuar edhe interesin primar për mbrojtjen e mjedisit, dhe vendosi shtyrjen e afatit për të hyrë në fuqi vendimi nga 28 shkurti 2019 deri në 31 Dhjetor 2019”, tha ndër të tjera ministrja.
Një tjetër ndryshim i miratuar sot është edhe afati i lejuar për zhdoganimin. “Parashikohet të lejohet zhdoganimi i mjeteve që kanë hyrë deri në 31 dhjetor 2019”, shtoi ajo.
