Ish-kreu i LSI-së ka folur për mediat lidhur me situatën politike. Meta u shpreh se në zgjedhjet e 25 qershorit do të ketë surpriza, ndërsa shtoi se LSI-ja do të dalë forcë e parë politike.
Për sa i përket marrëveshjes PS-PD, Meta tha se shqiptarët do zgjedhin, ndërsa ritheksoi se LSI do të jetë forcë e parë politike dhe se është i qetë që evitoi rënien e demokracisë në humnerë:
“Dua të shpreh kënaqësinë time edhe njëherë që sot të gjithë jemi më të qetë dhe më të lehtësuar se dy ditë më parë kur zgjedhjet ishin në buzë të greminës. Dua të falendëroj faktorët ndërkombëtarë dhe vendas, sidomos BE-në dhe SHBA-në që dhanë kontributin e tyre për të patur zgjedhje gjithëpërfshirëse në mënyrë që shqiptarët të shkojnë të qetë drejt zgjedhjeve me standarde evropiane. Është mjaft e rëndësishme për sigurinë e qytetarëve.
Së pari seanca do të mblidhet në momentin që do të jenë të gatshme të gjitha procedurat, së dyti të gjithë shqiptarët ishin të rrezikuar nga zgjedhjet pa opozitën. Tani të gjithë duhet të jenë të qetë se tani ka garë dhe jam i sigurt që do të ketë edhe surpriza.
LSI ka qenë forca e parë që ka insistuar për dialog dhe ka qenë e gatshme për të krijuar një qeveri besimi.
LSI ka qenë e gatshme për t’i dhënë të gjitha ministritë dhe postet se LSI e ka fuqinë te rinia. Nuk ka pasur asnjë arsye për t’u konsultuar me LSI-në. KA shumë alternativa, KA GARË, KA DEMOKRACI, do të ketë surpriza.
Zgjedhjet do i garantojnë të gjitha forcat politike, ne nuk do donim krizë, do donim që marrëveshja të ishte bërë muaj më parë dhe t’ia kishim kursyer vendit këtë. Për fat të mirë bulwvardi është i qetë, Tirana është e qetë, shqiptarët le të zgjedhin.
Unë deri n 23 korrik jam anëtar i LSI-së dhe dua t’ju siguroj që do respektoj çdo vendim që do marrë LSI-ja.
Jam i bindur që LSI-ja do të jetë forca e parë në zgjedhjet që po vijnë. E rëndësishme është që vendi sot është më i qetë, më i lehtësuar. LSI është investuar për një proces zgjedhor të ndershëm, ka ofruar të gjitha postet e saj në funksion të një marrëveshjeje dhe besoj që LSI-ja është shumë e qetë që ka garantuar që zgjedhjet të mos binin në humnerë.
Demokracia është surprizë.”/ TIRANA TODAY