Nga: Denis Dyrnjaja
Ambasadorja Amerikane znj. Yuri Kim organizoi një takim me ish ministrat e punëve të jashtme të Shqipërisë. Nëse në foton zyrtare te takimit do të mungonte Ilir Meta, sigurisht që nuk do të kishte ndonjë interes një takim sa kortezial, aq edhe simbolik në kuadër të 100 vjetorit të ‘marrëdhënieve SHBA-Shqipëri’.
Në fakt duket sikur lajmi është prezenca e Metës në ambientet e Ambasadës Amerikane në Tiranë. Por jo! Lajmi i vërtetë është se Meta kaloi oqeanin. Ai shkeli në ambientet e Ambasadës Amerikane pas shumë kohësh, ndërsa nuk begenisej në asnjë takim nga zyrtarët amerikanë dhe jo vetëm, për të paktën 3 vite.
Pra, Presidenti në detyrë duket se tani nuk ka asnjë ngërç në marrëdhëniet me Washingtonin edhe pse ai vetë në mënyrë të vazhdueshme ka deklaruar se marrëdhëniet e tij me SHBA kanë qenë gjithmonë të shkëlqyera. Ndërkohë që flitej e pritej shpallja “non grata” e tij, pasi retorika ndaj ambasadores Kim ishte tejet sfiduese, gati gati përçmuese, në fakt ndodhi ajo që nuk mendohej, pra e kundërta, rehabilitimi i Metës dhe kapërcimi i kontraksioneve psiko/politike të tij.
Kujtoni që pak kohë më parë presidenti sfidonte apo vetëviktimizohej duke thënë se ishte i gatshëm të shkonte te Mali me Gropa e të priste ekzekutimin nga ndonjë raketë amerikane. Kishte plot te tjera si këto mes shfaqjeve sfiduese dhe përulëse. Ky grotesk duket se është kapërcyer tanimë si nga Meta ashtu dhe nga amerikanët, që mesa duket kanë zgjedhur të bëjnë një diferencim mes tij dhe Berishës, që mban statusin “non grata” nga Departamenti Amerikan i Shtetit.
Po si dhe pse ndryshoi qasja amerikane ndaj Metës?! Çfarë ofroi, ose më saktë çfarë lëshoi Presidenti Sovranist që shtyu amerikanët të ndryshojnë qëndrim e të rehabilitojnë e ridimensionojnë marrëdhëniet me të?! A është kjo skema për të sjellë ndryshime të papritura pushteti në Shqipëri e zbritur Edi Ramën nga froni 3 mandator qeverisës?!
Pra a ju ka ardhur Rama amerikanëve në majë të hundës?! Apo kjo është ngjizja e një aleance të re Rama-Meta për të nxjerrë nga politika dhe izoluar përfundimisht Sali Berishën, që nuk resht së sfiduari SHBA?! Buzëqeshjet e shtuara mes Monika Kryemadhit dhe Taulant Ballës, gatishmëria e Metës për të kryer me shpejtësi të paparë më parë procedurat në favor të zgjedhjes së presidentit të ri Bajram Begaj, apo vijimi dhe përshëndetja e Ambasadores Kim për emërimin e gjyqtarëve të rinj nga Meta, të shtyjnë të mendosh se përveç se diçka e rëndësishme ka ndodhur në raportet mes Ilir Metës dhe amerikanëve, një skenar me intriga politike po gatuhet.
Se kush do buzëqeshë në fund mbetet për t’u parë. Por tani për tani e dukshme është që Meta ka përfituar një bonus goxha të madh. Se me çfarë kostoje koha do ta tregojë. Por ai tani ngjan si i penduari i çliruar i perandorisë amerikane që e ka në themel të filozofisë së saj që miqtë i shndërron në armiq e armiqtë në miq. Kjo devizë në fakt mban me shpresë edhe egon e Berishës se statusi i tij “non grata” mund të shndërrohet në “Once upon a time…” Dhe se ka keq. Kur rehabilitohet Meta pse të mos pretendojë të rehabilitohet edhe Berisha. Në fund te fundit ne mbetemi një vend për eksperimente politike, por gjithnjë me adhurimin e pandryshuar për Amerikën Demokratike.
