Fernando Hierro njeriu që mori në dorë Spanjën vetëm dy ditë para se të startonte Botërori i Rusisë tashmë është larguar. Ai zëvendësoi Lopeteguin i cili u shkarkua nga Federata spanjolle pasi bëri publike kontratën që kishte nënshkruar me Real Madridin. Eksperienca e Hierro me “La Roja” zgjati vetëm për disa ditë dhe tani ai nuk do të jetë edhe pjesë e Federatës.
Trajneri i Spanjës gjatë Botërorit ka refuzuar që të kthehet në rolin e tij të mëparshëm si drejtor sportiv, edhe pse ka një kontratë me Federatën Spanjolle të Futbollit (RFEF). “Hierro po kërkon horizonte të reja dhe kërkon të nisë sfida të reja profesionale”, lexohet në komunikatën e RFEF-së. “Vlerësojmë profesionistin dhe njeriun dhe i urojmë gjithë të mirat”, shtohet më tej në komunikatën zyrtare.
Ndërrkohë që Spanja tashmë është duke kërkuar një trajnerë të rinj dhe kanë dalë emrat e parë. Më i favorizuari deri tani është ish-trajneri i Barcelonës, Luis Enrique. Momentalisht trajneri spanjoll nuk është duke trajnuar ndonjë ekip dhe shanset që të marrë në dorë “La Roja” janë shumë të mëdha.
Ai është një ndër trajnerët më të suksesshëm në Spanjë, pasi për aq vite sa drejtoi Barcelonën arriti të fitonte shumë trofe, por edhe të tregonte aftësitë e tij për të luajtur një futboll të bukur dhe mjaft të përshtatshëm për spanjollët.
