Kreu i LZHK-së, Dashamir Shehi, foli për bashkimin në opozitë të PDIU, ku tha se nga eksperienca ka mësuar se është një rrugë e gjatë dhe e vështirë. “Rruga është e gjatë dhe e vështirë. Opozita nuk është punë e lehtë. Për këtë kam eksperiencë të gjatë.
Është punë e gjatë dhe e vështirë, kështu që na duhen të gjitha forcat, aq më tepër ato që kanë dëshirë të përzënë Edi Ramën dhe grupin.
Bashkohemi përtej problemeve që kemi, për t’i hapur një rrugë të re për shumicën prej jush që të jetë ndryshe. Ndryshe Shqipëria do të shkojë poshtë e më poshtë.
Falenderoj zotërinë që ka ardhur, shpresoj të vijnë dhe të tjerë. Të bashkohen një pjesë e rëndësishme, siç janë intelektualët, akademikët.
Besoj se z. Basha do na drejtojë drejt një raporti të ri me institucionin më të rëndësishëm që ka Shqipëria, që është qytetari shqiptar. Ju falenderoj dhe njëherë. Kjo është një rrugë e gjatë, sa e kemi filluar”, deklaroi Shehi.
Shpëtim Idrizi dhe Mesila Doda, morën pjesë në takimin e opozitës, që këtë të enjte u mbajt në Vlorë. Idrizi u shpreh se PDIU është një vlerë e shtuar për opozitën. Ai tha se “PDIU mbështeti Reformën në Drejtësi, por sot ajo është e kapur nga qeveria”.
Shpëtim Idrizi theksoi se me bashkimin e PDIU, opozita, numerikisht është sot në mazhorancë. “Opozita sot numerikisht është në mazhorancë. Por sot ka ardhur dita që ne ti japim popullit ofertën tonë, për vendosjen e shtetit ligjor. Ka ardhur koha që pas 27 vjetësh, ta nxjerrim vendin nga tranzicioni”, tha Idrizi.
