Kryetari i PDIU-së, Shpëtim Idrizi, pas takimit me përfaqësuesit e Partisë Socialiste, është shprehur se ka gjetur vullnet nga ana e mazhorancës që Presidenti të jetë një figurë që nuk do të zgjidhet në mënyrë të njëanshme.
Pas takimit me Taulant Ballën dhe përfaqësuesit e PS-së për kandidatët e Presidentit të ri, Shpëtim Idrizi tha për mediat se në takim u theksua se do të jetë një figurë politike. Po kështu është dakordësuar që palët të bashkëpunojnë, dhe të kalojnë tashmë në emra konkretë.
“Është detyrim Kushtetues në mënyrë si zgjidhet Presidenti që në 3 raundet e para, duhet të jetë me konsensus. E theksuam këtë gjë nëse do zgjidhet me votat e thjeshta të mazhorancës.
Kjo shërben për të zgjidhur krizën parlamentare, pra do kemi një President të krizës. Theksuam që duhet të jetë thellësisht me eksperiencë politike, e një President që mbart pjesën tjetër të konsensusit.
Ne gjetëm një vullnet të mirë, vlen për ta verifikuar këtë që nuk do kemi një President të zgjedhur në mënyrë të njëanshme.
Ramë dakord që tani kemi hyrë në një proces Kushtetues, jo me ecejake mesh nesh por të fokusohemi me emra konkretë të identifikojmë kandidaturat pa paragjykuar njëri-tjetrin. Patëm dakordësinë me PS që ka ardhur koha të hyjmë në procesin e emrave konkretë”.
Në datën 16 maj do të zhvillohet raundi i parë i votimit për zgjedhjen e Presidentit, vendim i cili është marrë gjatë mbledhjes së Konferencës së Kryetarëve.
Më 15 maj ora 16:00 është afati i fundit për të dorëzuar propozimet zyrtare të deputetëve. Ndërsa më datën 16 maj ora 10:00, mblidhet Komisioni i Ligjeve për vlerësimin e kandidaturave.
