Avokati Idajet Beqiri ka kallëzuar në SPAK çiftin Meta-Kryemadhi. Paditësi akuzon Ilir Metën dhe Monika Kryemadhin se kanë fshehur të ardhurat, ndërkohë që janë shpenzuar shuma të mëdha parash për operacione plastike.
Në padinë e tij, Beqiri rendit dy raste kur sipas tij Meta dhe Kryemadhi kanë kryer trajtime mjekësore me vlera kolosale.
Trajtimi për Kryemadhin është bërë në San Marino, kurse Meta është trajtuar në Vjenë përgjatë viteve 2013-2014.
Dosja e cila është referuar në SPAK nga avokati Idajet Beqiri, përmban fakte për shpenzimin e qindra mijërave euro nga Ilir Meta dhe Monika Kryemadhi për t’u dobësuar dhe rimodeluar fytyrën në një klinikë VIP-ash botërore në San Marino. Referimi penal është shoqëruar edhe me një transaksion bankar me vlerë 287 mijë euro, përmes një kompanie offshore, për shërbime estetike në fytyrën e Monika Kryemadhit.
“Ndërhyrjet e kryera në vitet 2013-2014 nuk rezulton të jenë deklaruar si shpenzim i kryer në deklaratat periodike vjetore të viteve 2013-2014, pra është shpenzim i padeklaruar në ILDKPKI nga subjekti deklarues Ilir Meta për këtë krijohet dyshimi i arsyeshëm se dhe këto ndërhyrje dhe trajtime janë financuar me të njëjtën mënyrë me ato të mësipërme nga llogari offshore”, thuhet ndër të tjera në kallëzimin e avokatit Idajet Beqiri.
Ky i fundit denoncon se ndërhyrjet kirurgjikale që ka kryer Ilir Meta dhe Monika Kryemadhi për t’u dobësuar dhe për trajtime estetike janë bërë në spital në San Marino, ndërsa pagesat në vlerë 287.650 euro janë bërë përmes një banke në Qipro.
