Regjisori Saimir Kumbaro ka treguar bisedën e fundit me aktorin Xhevdet Ferri, që ndërroi jetë pasditen e sotme. Duke sjellë në kujtesë të gjitha rolet të cilat i ka sjellë me mjaft mjeshtëri, regjisori e kujton si një aktor shembullor. Dy muaj më parë ata kishin pirë një kafe së bashku, ku aktori i ndjerë e ndjente se ia kishte hedhur sëmundjes së rëndë.
“Xhevdetin e njoh që të ri, që kur luante teatër në Durrës, pastaj erdhi në Tiranë. Xhoda ka një gamë të gjerë në fushën e artit, ka arritur që të jetë dekan, drejtor i Teatrit, dy herë kryetar i QKF, ndërsa si role ka një galeri të paharrueshëm. Për mua ishte një aktor shembullor, i planit dramatik, ka qenë jo vetëm i devotshëm për çdo kërkesë që i kam bërë dhe pilotoi avionin MIG-17.
Për mua Xhevdeti nuk ka vdekur, ka vdekur fizikisht, por do të mbetet në ekran. Ishte djalë i kompletuar, i kulturuar. Brezat ndërrohen, por jo në këtë moshë, është shumë dramatike, është lajm tronditës dhe tragjik, 59-vjeç është shumë i ri. Njeriu nuk ka moshë. Xhevdetin e takova dy muaj më parë, pimë kafe bashkë, sa po kishte mbaruar kurën anti-kancer. “Ia hodha” më tha, ishte gjithë optimizëm.
Ky lajm më ka tronditur, sot e kujtova, dikush më tha se sot është në koma, mos thashë! Ishim në një komision dhe vendosëm cili do të shkojë për Oscar, vendosëm ‘Delegacionin’ ku Xhoda ka një rol kryesor. Ai së shpejti konkurron për Oscar. Xhevdeti ka marrë çmime shumë. Ka një gamë të madhe rolesh. Ngushëlloj familjen e tij, ndërsa së fundmi vajza e gëzoi shumë se e bëri gjysh. Dua të them se ai rrjedh nga një familje patriotike”, tha ai.
Xhevdet Ferri mbetet një prej aktorëve më të mirë të kinematografisë dhe teatrit shqiptar.
