Kryeministri Edi Rama ka vazhduar fushatën për zgjedhjet e 30 qershorit. Nga Çorovoda, Rama kërkoi votën për kandidatin e Partisë Socialiste, Adriatik Mema duke u shprehur se ajo duhet të bazohet në vepra.
Numri një i qeverisë theksoi potencialin që ka kjo zonë, ku dhe gjeti rastin që të falënderonte edhe Presidentin Meta, i cili kishte prezantuar bukuritë e mëdha siç janë edhe kanionet e Osumit.
“Ia di për nder Ilir Metës që më ka sjellë dhe më ka treguar mrekullinë e kanioneve, nuk e kisha parë ndonjëherë. E di shumë mirë çfarë potenciali ka kjo zonë, e di se sa strategjike është edhe rruga Berat-Përmet e cila duhet të përfundojë sa më parë, që të bëhet lidhja e kësaj zone me Përmetin, Gjirokastër e Tepelenën për të kthyer potencialin në funksion të turizmit dhe punësimit. Këto rrugë do jenë prioritete të Bashkisë së Çorovodës në 4 vjeçarin e ardhshëm”,- tha Rama.
Gjithashtu Rama foli edhe për kryetari aktual të bashkisë, ku u shpreh se kishin bashkëpunuar dhe kishin bërë punë mjaft të mira, por se me kandidatin e PS-së do të bënin akoma më shumë. Po ashtu një paralajmërim i Ramës ishte se do të largohen nga puna të gjithë ata që i mban partia në punë.
“Për hir të së vërtetës pavarësisht se mund të mos jeni dakord, edhe me kryetarin e bashkisë kemi bashkëpunuar dhe kemi bërë punë të mira, por jam i sigurt se mundësia për të bërë shumë më tepër është në dorën tonë, si jam i sigurt se kandidati ynë do të sjellë cilësi të re qeverisje dhe marrëdhëniesh me komunitetin dhe përfundim të domosdoshëm të shpenzimeve të tepërta për një administratë të tejfryrë deri edhe me njerëz që nuk jetojnë fare në Skrapar dhe marrin rroga. Dhe jam i bindur se do të dijë të vlerësojë pa filtra partie, por me sytë e një njeriu korrekt që ka ecur vetë personalisht mes profesionalizmit të gjithë ata që janë aktualisht në shërbim të punëve të bashkisë që meritojnë të vazhdojnë të qëndrojnë aty ku janë”– tha Rama.
Sipas tij, “Kush ka kontribuar dhe kontribuon në bashkitë e vendit për arsye të zotësisë, aftësisë, e përkushtimit nuk duhet të ketë asnjë dyshim se jo vetëm që nuk do të hiqet nga puna, por do të vlerësohet edhe më mirë për punën që bën. Kushdo tjetër që e di edhe vete që është si mbushës i topit të një partie apo tjetër do largohet që në datën 1 korrik, në kuptimin simbolik se duhet kohë e caktuar për të formalizuar gjithë procesin”- garantoi Rama.
Ne fund te fjales, Rama i eshte kthyer edhe njehere presidentit Meta. “Falenderoj shumë Ilirin që mi ka treguar kanionet kur bëmë rafting bashkë, por tani e kam mësuar sesi bëhet rafting kështu që e bëj edhe pa shoqërues”- tha ai.
