Kryeministri Edi Rama ishte sot në Çorovodë në kuadër të fushatës elektorale, ku kërkoi votën nga banorët për kandidatin e Partisë Socialiste, Adriatik Memës. Në këtë takim kryeministri foli edhe për atë se çfarë pritet të ndodhë më 30 qershor.
Rama tha se janë vetëm dy rrugë, ku së pari do të bëhen zgjedhjet dhe së dyti të gjithë ata që do të pengojnë zgjedhjet do të përballen me ligjin më të ashpër. Gjithashtu kreu i qeverisë i foli edhe për opozitën duke u shprehur se duke shpërndarë baltën, llumin e propagandës së tyre janë duke i bërë shumë dëm Shqipërisë.
“Në 30 qershor do ndodhin këto dy gjëra. Së pari do të bëhen zgjedhjet dhe do të nisë mandati i ri dhe së dyti do të ndëshkohen me të gjithë forcën e ligjit të gjithë ata që do të gabojnë duke shkuar pas berihait. Do të përballen me ligjin më të ashpër me plakun kryeministër, do të ndalohen të dalin jashtë shtetit dhe kur të dalin nga aty brenda ku do përfundojnë do të mbeten këtu brenda si pjesë e listës së zezë. Kush nuk e beson këtë le t’i bëjë një telefon plakut dhe ti thonë a është e vërtetë kjo. Nëse plaku thotë jo atëherë më pyesni mua se ua sqaroj unë edhe plakun”, tha Rama.
Rama foli gjithashtu edhe për protestat e opozitës, duke i cilësuar ato si llum dhe propagandë në dëm të Shqipërisë. Kryeministri theksoi se opozita është duke kërkuar njerëz të dëshpëruar, ti përdorë si mish për top në zgjedhjet e 30 qershorit.
“Dëshiroj që çdo shqiptar i arsyeshëm pavarësisht se për kë voton, ta mendojë si shqiptar se sa e rëndë është kjo që ata po i bëjnë Shqipërisë. Duke shpërndarë baltën, llumin e propagandës së tyre dhe duke e mbështetur këtë propagandë në disa përgjime që janë vetëm një arsye për të hetuar deri në fund. Siç mund ta keni parë dhe dëgjuar, nga prokurorja e Krimeve të Rënda në fakt nuk bëhet fjalë për luftë kundër krimit zgjedhor por për shantazh kundër reformës në drejtësi dhe kundër kësaj.
Unë nuk jam nga ata që gjëra të tilla të rënda në dëm të vendit ti pagëzoj si një strategji antishqiptarësh, nuk është problemi se këta janë antishqiptarë, këta nuk i duhen dreqit jo Shqipërisë. Nuk është problemi nëse e bëjmë apo jo me vetëdije këtë maskaradë, këtë sulm, luftë balte që vret çdo ditë nga pak sytë e njerëzve që e shohin Shqipërinë nga larg. Nuk ka pikë rëndësie si e bëjnë, por ajo që bëjnë është e patolerueshme. Nuk mund të tolerohet edhe asnjë shqiptar që do që kjo qeveri të largohet, nuk duhet kurrë sesi të mbështesë ata. Ka dy rrugë ose të shkojë në zgjedhje jo për të zgjedhur kryetarin por për të konfirmuar se Shqipëria nuk merret me maskarallëqe, ose të qëndrojë larg atyre që po kërkojnë njerëz të dëshpëruar për ti hedhur si mish për top’, tha Rama.
