Policia e Tiranës ka arrestuar sanitaren që hiqej si infermiere, ku i zhvati 8 milionë lekë qytetares dhe i la nënën që të vdiste nga Covid-19.
Tire Alldervishi, 58 vjeç, është prangosur nga blutë e Tiranës. Ishte emisioni “Stop” që denoncoi këtë rast të rëndë, ku punonjës të spitalit “Shefqet Ndroqi” bëjnë pazar me jetën e pacientëve.
Vajza e një zonje 55-vjeçare, e cila humbi betejën me Covid pas 28 ditësh lufte me këtë sëmundje, denoncoi faktin se një sanitare e këtij spitali, duke u hequr si infermiere, i ka marrë rreth 8 milionë lekë të vjetra për shërbimet ndaj nënës së saj.
“Specialistët e Seksionit për Hetimin e Korrupsionit, bënë ndalimin e shtetases Tire Alldervishi 58 vjeçe, banuese në Tiranë. Kjo shtetase i është prezantuar si infermiere shtetases E. S., 30 vjeçe, e cila ka kallëzuar se gjatë muajit dhjetor, kur nëna e saj ka qenë e shtruar në spital, shtetasja T. A. e ka mashtruar duke i marrë rregullisht shuma monetare nga 5.000-6.000 lekë. Vijojnë hetimet për identifikimin e personave të tjerë të implikuar në këtë veprimtari kriminale”, thuhet në komunikatën e Policisë së Tiranës.
Ndryshe nga sa pretendonte sanitarja, e ëma e denoncueses disa ditë përpara se të humbte jetën është ankuar për shërbimin, madje edhe se sanitaret i kanë mohuar ushqimin, pasi nuk donin që t’i ndërronin pampersat.
Mbrëmjen e së martës reagoi edhe Ministria e Shëndetësisë, ku kërkoi shkarkimin e menjëhershëm nga detyra të sanitares dhe të niste hetimi për rastin.
