Lamine Fadiga-Diabi ka kërkuar falje për veprimin e shëmtuar që bëri ndaj shokut të tij të ekipit, Kasper Dolberg, të cilit i vodhi orën e dorës që kapte vlerën 70 mijë euro.
Francezi e pranoi edhe vetë fajin se kishte vjedhur orën e shokut të skuadrës, gjatë kohës kur ky i fundit ishte në stërvitje.
“Fatkeqësisht unë isha i lënduar për disa muaj dhe direkt pasi u riktheva mora në karton të kuq me skuadrën e të rinjve. Unë isha shumë i mërzitur nga kjo, duke i shtuar këtu edhe suksesin e Dolberg, të cilin nuk e duroja dot. Unë isha shumë xheloz për shkak se sulmuesi danez po kalonte një formë të mirë. Në vend që unë të luftoja në fushë me të, për t’ia marrë vendin e titullarit, isha frikacak për këtë dhe bëra atë gjest të shëmtuar. Gjesti im nuk u ndikua nga lakmia, por nga zhgënjimi që nuk mund të luaja. Unë jam 18-vjeç dhe e ndjeja të nevojshme të kërkoja falje, të gjithë njerëzve në klub duke filluar nga Dolberg, trajneri dhe kapiteni Dante. Unë iu kam siguruar aty se do ta kompensoj objektin e marrë”, shkruan Fadiga-Diabi në “Instagram”.
