Një pacient 40-vjeçar nga Torino, të cilit i kishin thënë mjekët se ishte shëruar nga koronavirusi, ka rezultuar sërish pozitiv. Në testin e fundit ai ka rezultuar sërish pozitiv për Covid-19. Aktualisht italiani ndodhet në izolim.
Lidhur me këtë rast, Profesor Giovanni Di Perri ishte shprehur më herët: “Ne konfirmojmë që ai është shëruar”.
Teksa koronavirusi ka dhënë shenjat se është rikthyer sërish, mjekët argumentojnë se ekziston një farë mundësie që shenjat e një infeksioni të mbeten në organizëm, edhe pasi pacienti është shëruar.
Profesori Di Perri ka thënë se kjo ndodh me të gjitha infeksionet.
“Ai duhet të jetë i durueshëm. Do duhet të rri në izolim për të mbrojtur familjen dhe komunitetin. Më pas, mjekët do të kryejnë një test shtesë kontrolli, për të pasur siguri të plotë se ai mund të dalë nga spitali”.
Italia është vendi më i prekur nga Covid-19 në Europë. Qeveria italiane ka forcuar masat shtrënguese, duke futur krimin e “epidemisë” në rastet që parashikojnë deri edhe burgim nga 3 deri 12 vjet për ata që shkelin karantinën. Të hënën në Itali u regjistruan afro 2.500 raste të reja të koronavirusit, një shifër e lartë, por më e ulët se 2863 të regjistruar të dielën.
