Profesori Neil Ferguson, i cili i sugjeroi kryeministrit britanik të vendoste bllokimin e vendit, është larguar nga detyra, për shkelje të masave që propozoi vetë.
Ferguson i cili ishte një nga këshilltarët kryesorë të Boris Johnson, mësohet se ka dhënë dorëheqjen.
51-vjeçari i kishte kërkuar gruas së tij të udhëtonte drejt Londrës, për ta vizituar në shtëpinë ku po qëndronte, pavarësisht bllokimit. Lidhur me këtë akt, profesori ka pranuar se ka vepruar gabim.
“E pranoj që kam vepruar gabim. Besova se pas 14 ditësh pas testimit, do të isha imun ndaj koronavirusit.
Më vjen keq për mesazhin negativ që përcolla tek njerëzit, me veprimin tim të nxituar. Duhet të tregohesha një model në ndjekjen e rregullave të kësaj epidemie shkatërruese, por i zhgënjeva të gjithë.
Njësoj si ju, edhe unë duhet të zbatoj çdo masë dhe udhëzim qeveritar. Për këtë arsye e ndjej të nevojshme të jap dorëheqjen”.
