Një rast i rëndë u raportua një ditë më parë në qytetin e Shkodrës. Një 5-vjeçar ra aksidentalisht nga automjeti i të atit, duke mbetur i plagosur. Ngjarja, sipas policisë, ndodhi rreth orës 17:25 minuta në lagjen “Skënderbeg”. 50-vjeçari udhëtonte me 4 fëmijët e tij, kur i mituri ra nga mjeti. 5-vjeçari ndodhet aktualisht nën kujdesin e mjekëve, në spitalin e Shkodrës. Lidhur me këtë ngjarje ka reaguar drejtori i spitalit, i cili tregon se i mituri ende nuk e ka kaluar rrezikun.
Drejtori i spitalit rajonal të Shkodrës, Ardian Dajti, ka deklaruar se gjendja e fëmijës 5-vjeçar “është më e qetë, por vazhdon të jetë në reanimacion dhe ende nuk e ka kaluar rrezikshmërinë. Mjekët po kujdesen për të, por nuk ka një përkeqësim të gjendjes së tij shëndetësore. Duhet pritur sërish për të patur një përgjigje mbi gjendjen shëndetësore në ditët në vazhdim”, tha ai.
Babai i fëmijës, Hilmi Kurtaj, teksa po udhëtonte me mjetin e tij, nuk e ka vënë re që fëmija ka rënë nga makina. Ka qenë një makinë tjetër që e ka parë rastësisht në rrugë fëmijën e mitur, të gjakosur dhe në gjendje të rëndë shëndetësore. Duke e marrë menjëherë dhe duke e dërguar në urgjencën e spitalit rajonal të Shkodrës.
Sipas babait të fëmijës, i vogli ka hapur dritaren e pasme të makinës në të cilën ndodhej, dhe ka rënë në rrugë duke u dëmtuar. Hilmi Kurtaj ka vijuar rrugën dhe nuk e ka vënë re aspak se fëmija ka rënë nga xhami i pasmë i mjetit që po drejtonte. Vetëm pasi ka shkuar në shtëpi, babai e ka kuptuar se fëmija i tij nuk ndodhej në makinë. Pas publikimit të këtij lajmi, babai ka shkuar menjëherë në spitalin rajonal të Shkodrës, duke mësuar se fëmija i tij ndodhej aty në gjendje të rëndë shëndetësore. 50- vjeçari u ka treguar mjekëve dhe policisë se nuk e kuptuar që fëmija 5-vjeçar ka dalë nga dritarja, dhe ka rënë në mes të rrugës.
