Prej ditësh akademiku Artan Fuga ka denoncuar skandalin që po bëhet me zgjedhjet në Akademinë e Shkencave, ku akuzon se politika po ndërhyn në këtë proces.
Emri i kandidatit të vetëm Skënder Gjinushi është lakuar shpesh nga akademiku Fuga, ndërsa sërish ai ka ironizuar kandidimin e tij.
Në një postim në Facebook, Fuga shkruan se kandidati pa rivalë për Akademinë e Shkencave, Skënder Gjinushi ka 12 vite që shkel ligjin duke mbajtur njëherësh postin e kryetarit të partisë dhe atë të anëtarit në akademi. Ndërsa shprehet me ironi se ai po respekton zgjedhjet duke hequr dorë nga politika tre ditë para zgjedhjeve.
Postimi i Artan Fugës:
Ngriva shkriva
————–
Kandidati pa rivalë për kryetar i Akademisë së Shkencave paska shpallur sot se pas tridhjetë vjetësh në politikë ai nuk qenka më politikan, por është bërë akademik i pavarur.
Krejt i pavarur! Brenda një minute!Tre ditë para zgjedhjeve!Ka ngrirë të gjitha funksionet politike!Të zënë në grackë nga vetja e tyre kanë filluar të luajnë ngriva – shkriva!
Vërtet për t’u shkrirë së qeshuri!Ka 12 vjet që shkel ligjin duke qenë dhe anëtar akademie dhe kryetar partie dhe tre ditë para se të vetëshpallet kryetar vendos t’a respektojë atë!
