Zbardhen detaje të reja në lidhje me tragjedinë e ndodhur dy ditë më parë në Velipojë, ku nga përplasja me armë midis familjeve Ferracaku dhe Gocaj, mbetën të vrarë 4 persona dhe 2 të plagosur.
Sipas të dhënave të ekspertizës së policisë së Shkodrës ka qënë Hasan Ferracaku ai i cili bashkë me djemtë dhe nipin e tij, kanë vrarë më armë zjarri dy vëllezërit Gocaj si dhe kamarierin 19 vjeçar Musaen Zeneli.
Në drejtim të Edmond Gocajt ka qëlluar, Hasan Ferracaku, me armë zjarri pistoletë duke e lënë të vdekur në vend. Më pas vellai i tij Xhovani Gocaj i cili ka qënë disa metra më tutje, ka qëlluar në drejtim të Kujtim Ferracakut duke e lënë të vdekur si dhe ka plagosur edhe Hasan Ferracakun dhe Elmelind Dylin nipin e viktimës.
Pavarësisht se Hasan Ferracaku ka marrë plagë në njërën dorë ai ka qëlluar edhe në drejtim të Xhovan Gocaj dhe kamarierit 19 vjeçar, i cili fatkeqësisht humbi jetën.
Në vendin e ngjarjes janë gjetur 22 gëzhoja armësh, 8 gëzhoja arme zjarri pistolete, 5 gëzhoja armë zjarri automatiku, 5 gëzhoja arme zjarri pistolete dhe 1 fishek armë zjarri pistoletë me kapsollë të pagoditur si dhe 3 prella arme zjarri të dëmtuara pjesërisht.
