Një sherr për parkimin në Sarandë ka përfunduar mbrëmjen e djeshme me një viktimë. Policia bën me dije se Klodian Bakia, 41-vjeç, kishte parkuar përpara një hoteli dhe kamerieri i ka kërkuar që të heqë makinën nga aty. Kaq ka mjaftuar që të nisë një konflikt mes 41-vjeçarit dhe kamerierit të hotelit, Xhanelo Tarja, 24-vjeç.
Në debat e sipër, 24-vjeçari është futur brenda në hotel, ka marrë thikën dhe ka qëlluar në zemër 41-vjeçarin. Bakia nuk i mbijetoi dot plagëve të marra, dhe ndërroi jetë në spitalin rajonal të Sarandës.
Policia e Sarandës ka arrestuar 24-vjeçarin Xhanelo Tarja për vrasjen e 41-vjeçarit në Sarandë. Autori i cili pasi e goditi me thikë në zemër viktimën, u fsheh në një garazh larg vendit të ngjarjes. Grupi hetimor ka sekuestruar kamerat e sigurisë në zonë, për të bërë të mundur zbardhjen e plotë të dinamikës së ngjarjes.
