Që nga viti 1912 e deri më sot, Shqipëria numëron 62 Ministra të Brendshëm. Historia e pjesës më të madhe të tyre ka qenë tragjike. Tetë prej tyre janë vrarë në atentate. Rastet më të bujshme kanë qenë ai i Esat Pashë Toptanit, Hasan Prishtinës, Luigj Gurakuqit, dy të fundit bashkëpunëtorët më të ngushtë të Ismail Qemalit.
Tetë ministra të tjerë janë pushkatuar, kryesisht në kohën e regjimit komunist si ish-zogistët Fejzi Alizoti, Koço Kota, apo ish-drejtuesit e lartë komunistë, Koçi Xoxe, Mehmet Shehu, Kadri Hazbiu dhe Feçorr Shehu.
Ndërkohë 5 ish-titullarë të kësaj ministrie, janë dënuar më vdekje në mungesë. Mes tyre spikat emri i mbretit Ahmet Zogu, që u dënua nga komunistët sapo morën pushtetin. Pas viteve 1990, ish-ministrat e brendshëm të viteve 1980 dhe fillimit të viteve 1990, u arrestuan dhe dënuan për gjenocid dhe krime lufte.
Kryeparlamentari aktual Gramoz Ruçi, u vu nën akuzë për ngjarjet e 2 prillit 1991 në Shkodër, ku mbetën të vrarë 4 persona.
Por fajësia e tij nuk u vërtetua. Vitet e fundit, Lulzim Basha është akuzuar për vrasjet e 21 janarit 2011 para kryeministrisë, Saimir Tahiri për lidhje me trafikantët e drogës, dhe së fundmi Fatmir Xhafa për vëllain e tij të dënuar për trafik droge.
