Mjaft polemika ngjalli kreu i Bashkisë së Tepelenës, falë këngës së dedikuar ish diktaktorit Enver Hoxha. Perpos PD-së, ka reaguar edhe kreu i Unionit të ish të përndjekurve politik, Besim Ndregjoni. I ftuar në studion e “Faxnews”, Ndregjoni ka kërkuar që Peçi të mbajë përgjegjësi për veprimin e tij.
“Vetë ky kryebashkiak e njeh Kushtetutën e vendit, atëherë mban përgjegjësi deri në ndjekje penale, dhe mban përgjegjësi që i këndon në një festë lokale diktaktorit. Nuk do kishte asnjë peshë nëse politika nuk do të qëndronte në gadishmëri, dhe të thoshte ky anëtar i një partie pasardhëse të Partisë Komuniste i këndon Enver Hoxhës.
Dënimi i sistemit, e gjithë ky sistemi stalinist enverian, prej 50 vjetësh në Shqipëri nuk u dënua. Kur i ligu bën të fortin, ku krimineli bën të fortin, kryebashkiaku i këndon Enverit, janë akumulin prej 27 vitesh të mosdënimit të përfaqësueve të Partisë Komuniste.
Ky kryebashkiak në një krah paraqitet krah të viktimave, në një krah i këndon Enver Hoxhës. Brezi juaj e njihni si udhëheqës së luftës, nuk e njihni për krimet. Politikbërja gjatë 28 vitesh ka mbrojtur diktaktorin në heshtje. MASH ka mbushur librat pro Enverit”, tha Ndregjoni.
Kreu i Unionit të ish të Përndjekurve Politik, ka kërkuar nga kryeministri Rama dhe Parlamenti, dënimin dhe shkarkimin e Peçit. Ai ka thënë me tej se Rama duhet ta shkarkojë atë brenda 24 orësh, pasi ky akt është i patolerueshëm në një vend demokratik. Po kështu, i ka mëshuar fort faktit se në Republikën e Shqipërisë nuk lejohen regjime fashiste, apo parti që kanë qëndrime diktaktoriale.
“ Kryeministri duhet ta shkarkojë brenda 24 orëve, është e patolerueshme në një vend demokratik shqiptar. Ç’mund të them unë që ky kryebashkiak merr guximin të bëjë një vepër të tillë.
Në Republikën e Shqipërisë nuk lejohen regjime fashiste, apo parti që kanë qëndrime diktaktoriale. Apo e përdorin këngën e tij për politikë, sepse dëshmorët nuk kanë rënë për diktakturë, pavarësisht se ajo parti e mori pushtetin me diktakturë. Dorëheqjen ta kërkojë Parlamenti që ka një rezolutë ndërkombëtare për ndalimin e propagandës pro Enverit. Duhet urgjentisht kryeministri të marrë masat e duhura”, u shpreh ai.
