Pak ditë më parë në pranga ranë dy punonjës të aeroportit të Rinasit, pasi vidhnin bagazhet e pasagjerëve. Ata kanë pranuar fajësinë e tyre për vjedhje, si edhe kanë treguar se sendet që grabisnin, i fshihnin në këpucë dhe në organet gjenitale. Ata kanë thënë se kur merrnin lekë ose sende me vlerë, menjëherë iknin nga puna, për të mos i pikasur. Justifikimi kishte të bënte edhe me çështjet familjare, si shkak për të mos lënë gjurmë.
“Sendet e vjedhura i merrnim dhe i fshihnim nëpër organe gjenitale, ose në shollat e këpucëve. Kur merrnim lekë ose sende me vlerë, iknim menjëherë nga puna. Largoheshim duke nxjerrë justifikime për probleme familjare”, janë shprehur ata.
Më 20 maj, në operacionin “Bagazhi”, u arrestuan dy punonjës të ngarkim-shkarkimit të bagazheve në aeroportin e Rinasit, pasi akuzohen për disa vjedhje.
Sipas policisë, këta dy punëtorë hapnin bagazhet e pasagjerëve në Rinas dhe merrnin prej andej para dhe sende me vlerë, si bizhuteri e flori. Të arrestuarit janë D. M. 22 vjeç, banues në Tiranë dhe E. Rr., 24 vjeç.
