Analisti Agron Gjekmarkaj, i cili është i dyti në listën e kandidatëve për deputetë të Partisë Demokratike në qarkun e Lezhës është shprehur se ka qenë pikërisht kryeministri Edi Rama, personi që e ka shtyrë të kandidonte.
I ftuar në “FrontLine” në “News24”, Gjekmarkaj tha se ka qenë shumë i kënaqur me punën e tij si pedagog dhe analist, por fakti që sipas tij, Rama nuk i lë të bëjnë punën e ka shtyrë të bashkohet me Opozitën për rrëzimin e qeverisë.
I pyetur për qarkun dhe për numrin në të cilin është vënë në listë, Gjekmarkaj tha se ai vetë nuk ka kërkuar gjë, por propozimi i është bërë vetë nga kryedemokrati Lulzim Basha, dhe e ka pranuar me kënaqësi.
Intervista e plotë:
Gazetarja Marsela Karapanço: Më mirë nga studio e lajmeve si analist apo deputet?
Agron Gjekmarkaj: Janë etapa të ndryshme, i shoh si vazhdim. Rrëshqitja ime në politikë është analiza politike.
Gazetarja Marsela Karapanço: Kush ua komunikoi?
Agron Gjekmarkaj: Basha, e falënderova Bashën, e pranova me kënaqësi.
Gazetarja Marsela Karapanço: Sa kohë keni që jeni në dijeni?
Agron Gjekmarkaj: Ky është një diskutim tavoline, nuk ka rëndësi.
Gazetarja Marsela Karapanço: Interes ka, është i minutës së fundit?
Agron Gjekmarkaj: Është një propozim jo shumë i hershëm, por në kohën e duhur.
Gazetarja Marsela Karapanço: Çfarë ju bindi?
Agron Gjekmarkaj: Njeriu që më ka bindur është Edi Rama. Ai nuk na lë të bëjmë punën tonë. Unë isha i kënaqur si pedagog dhe analist, por jam i mendimit që gjithkush duhet të japë kontributin e tij dhe të rrëzojë këtë qeveri. Kjo më ka bindur dhe shtysa kryesore që të kemi rolin e një opozitari jashtë politikës.
Gazetarja Marsela Karapanço: Duke bërë një bilanc, ju e keni zgjedhur me bindjen e plotë për të qenë në foltore, pasi dhe ju i keni kritikuar shpesh deputetët?
Agron Gjekmarkaj: Nuk do të jem si deputetët që kam kritikuar, nuk do e kem qëllim në vetvete kritikën, por nuk do i shmangem kur duhet me e bërë. Nuk do të më shikosh në pozicionin e njeriut qesharak, që të zezës i thotë e bardhë dhe të bardhës së kuqe.
Gazetarja Marsela Karapanço: Ju jeni në Lezhë, e zgjodhët vetë?
Agron Gjekmarkaj: Unë s’kam bëre asnjë kërkesë, më ka ardhur e tillë nga Basha. Kam menduar të hy nr. 2 në listën e Lezhës, ofertë që e kam pranuar.
Gazetarja Marsela Karapanço: A jeni mërzitur që nuk jeni në krye?
Agron Gjekmarkaj: Nëse do të isha në krye të Lezhës do të zgjidhja Markun, është një nga personat më me integritet që ka sot Shqipëria. Ka mbajtur qëndrime kritike, një njeriu i shkolluar jashtë vendit, një kartë e fortë morale. Karta më e fortë që ka Marku.
