Gjyqtari i Gjykatës së Shkallës së Parë në Shkodër, Andri Ymeri, ka thënë për mediat se zjarrvënia ka lidhje me detyrën e tij. Pak pas marrjes në pyetje nga policia, Ymeri ka thënë: “Nëse kam qenë unë objektivi, ta harrojnë se mund të më bëjnë presion”.
Mes të tjerash ai theksoi se në punën e tij, gjyqtari është i përgatitur për çdo gjë. Andri Ymeri është shprehur se ngjarja ka lidhje me detyrën e tij, por ai nuk do të tërhiqet.
“Gjyqtari duhet të jetë i përgatitur për çdo gjë. Ne duhet të jemi të përmbajtur, dhe çfarë kisha për të thënë, i thashë në polici. Normalisht që ngjarja ka lidhje me detyrën, por unë nuk tërhiqem. Nëse kam qenë unë objektivi, ta harrojnë se mund të më bëjnë presion”, tha gjyqtari.
Makina e gjyqtarit të Shkodrës, Andri Ymeri është djegur plotësisht rreth orës 23:20 të mbrëmjes së djeshme, pranë Kishës Françeskane në Shkodër. Makinës tip Mercedez-Benz në pronësi të gjyqtarit Ymeri, që ishte parkuar në lagjen “Vasil Shanto”, i është vënë flaka nga dy persona të cilët janë fiksuar nga kamerat e sigurisë së bizneseve aty pranë. Pasi i kanë vënë flakën automjetit, ata janë larguar.
