Deputeti i Partisë së Ashkalinjve për Integrim, Etem Arifi, është dorëzuar në organet e drejtësisë. Mediat në Kosovë raportojnë se deputeti Arifi është duke u transferuar në burg.
Etem Arifi është dënuar me një vit e tre muaj burg për mashtrim me subvencione. Vendimi u bë i plotfuqishëm në janar të 2020-s.
Për dënimin në fjalë, Arifi ishte ankuar në Gjykatën Kushtetuese, por kjo e fundit javën e shkuar njoftoi se e ka shpallur të papranueshme kërkesën e tij. Bëhet me dije se ai ishte në arrati.
Arifi ka ushtruar mandatin e deputetit, ndonëse Kushtetuta në paragrafin e tretë të nenit 70 përcakton që “mandati i deputetit mbaron ose bëhet i pavlefshëm, nëse: … dënohet me vendim gjyqësor të formës së prerë për vepër penale me një ose më shumë vjet burgim”.
