Edhe gjatë pasdites kanë vijuar shoqërimet e protestuesve që morën pjesë në protestën e PD-së sot në Elbasan, ku një prej tyre ka qenë edhe ish-deputeti i PD-së, Luçiano Boçi. Pas dhënies së dëshmisë së tij në polici, ish deputeti është liruar, ku ka bërë edhe një deklaratë për media. Në deklaratën e tij, Boçi ka dënuar dhunën e policisë ndaj opozitës, duke u shprehur se ky akt dëshmon se uniformat blu janë në shërbim të Ramës.
“Kjo është hakmarrja meskine e Edi Ramës, për shkak se qytetarët e Elbasanit e braktisën takimin e tyre, kërkuan ndalimin e ardhjes së tij në Elbasan për të gjitha ato arsye të cilat tashmë i dinë të gjithë qytetarët. Në fakt këta kërkojnë të burgosin opozitën, por opozita s’mund të burgoset. Opozita nuk është vetëm Partia Demokratike, opozita janë të gjithë qytetarët.
Veprimi i sotëm tregon që policia është vënë krejtësisht në shërbim të Edi Ramës, pasi sot është ndaluar pjesa e zinxhirit politik të Partisë Demokratike, të qarkut të Elbasanit. Janë gati 15 të ndaluar, të proceduar penalisht për miting gjoja të paligjshëm, por që qytetarët janë në të drejtën e tyre për të protestuar ndaj kryeministrit, ndaj kësaj qeverie në bazë të Kushtetutës dhe të drejtës që e njeh ligji. Tek e fundit protesta nuk ka qenë e dhunshme nga protestuesit, dhuna ishte nga ana e policisë.
Të gjitha pamjet janë të regjistruara nga media, por edhe nga qytetarë që kanë qenë aty, kanë dëshmuar qartë që policia ka qenë e armatosur deri më dhëmbë, me armatim të rëndë, me kallashnikov, me pistoleta. Ka provokuar, ka shtyrë, ka sharë, dhe ka goditur qytetarët, vetëm e vetëm që kryeministri i policisë së vetë të kalonte i qetë, por jo vetëm rrugët por edhe situata në Elbasan e gjetën ashtu sikurse ai nuk dëshironte.
Qytetarët e braktisën, megjithëse shumica ishte marrë me zor me autobus nga Librazhdi, nga Cërriku. Në fakt sot kryeministri ka marrë përgjigjen e tij të merituar, ndërkohë që nervozizmi i tij vazhdon, dhe ky fakt i sotëm është dëshmi e nervozizmit të tij dhe tregon qartë që ditët e Ramës janë të numëruara”, tha ai.
