Ditën e premte, policia arrestoi Ragip Hajdinin, i cili akuzohet për grabitjen në Rinas.
Sipas gazetës “Express”, Hajdini është shok i ngushtë me një biznesmen të njohur, si dhe ka qenë mik me vëllain e një ministri në Kosovë.
Deri pak kohë më parë biznesmeni në fjalë ka qenë edhe Konsull Nderi i Shqipërisë në Kosovë, ndërsa sapo ndodhi grabitja në Rinas, ky i fundit ka zhdukur numrin shqiptar, shkruan “Express”.
Duke iu referuar medias kosovare, Hajdini në vitin 2008 ka qenë i arrestuar në Gjermani, duke mos bërë të ditur veprën penale.
Ndërkohë, 50-vjeçari i arrestuar, ka qenë i dyshuar për grabitjen e thesarit në Pejë, por më vonë ai është liruar nga akuzat, duke u lënë i lire, pasi nuk ka pasur prova për implikimin e tij, ndërsa hetimet për ngjarjen vazhdojnë nga autoritete kosovare, por ende nuk ka asnjë të dënuar.
Emri i tij doli nga dëshmia e bashkëpunëtorit të drejtësisë, Alkond Bengasi, i cili e përshkruante atë si njeriun që takonte shpesh Admir Muratajn dhe Klement Çalën.