Ish-futbollisti i Kombëtares, Klodian Duro, është prangosur nga Policia e Tiranës për shkelje të urdhrit të mbrojtjes dhe për kanosje. 42-vjeçari është denoncuar nga ish-bashkëshortja, e cila kërkoi ndihmën e policisë që të ndërhynte. Klodian Duro ka qenë divorcuar me partneren, e ndërsa kjo e fundit kishte marrë një urdhër mbrojtje.
Mësohet se në datën 24 mars, ish-futbollisti i Kombëtares ka shkuar në banesën e ish-bashkëshortes, duke e kanosur këtë të fundit e cila ka lajmëruar policinë.
Burime të sigurta për “Panoramën” bëjnë me dije se Duro pasi është arrestuar, është dërguar në Komisariatin nr.1.
Më pas, gruaja ka firmosur edhe kallëzimin ndaj futbollistit, i cili gjendet në telashe. Pritet që për dhunën në familje, ish-futbollisti të dalë para gjykatës ditën e shtunë, i dyshuar për dy vepra penale.
Ky lajm ka shtangur gjithë opinionin sportiv në Shqipëri, ndërsa kryefjala e ditës tashmë është koronavirusi vdekjeprurës.
