Trajneri Skënder Gega, ka dhënë dorëheqjen nga Kukësi, pas humbjes së thellë me Partizanin. Vetë largimi i trajnerit është pranuar nga ana e presidentit Safet Gjici, siç njoftohet me anë të një postimi në rrjetet sociale nga klubi i Kukësit.
Menjëherë pas ndeshjes, trajneri ka marrë vendimin për t’ia komunikuar këtë vendim klubit. Po kështu, ky vendim është pranuar dhe është vënë në dijeni presidenti i nderit Safet Gjici.
Pas ndeshjes, trajneri ka takuar skuadrën dhe stafin teknik për t’u përshëndetur. Në një intervistë të dhënë për “Panorama Sport”, ai shprehet se kishte përgjegjësi, ndaj dhe erdhi vendimi për tu larguar nga Kukësi.
Skënder Gega tregon ndër të tjera se ka patur edhe një bisedë me Gjicin, ku ky i fundit i kishte kërkuar që të mos ngutej, pasi në futboll do të hasej edhe me situata të tilla.
Intervista
Gega, pse u larguat nga Kukësi?
Për faktin se në situata të tilla duhet që dikush të marrë përgjegjësi. Për mendimin tim, humbja me Partizanin ishte e tillë.
“E tillë” në ç’kuptim?
Në kuptimin që nuk mund të vendoset para përgjegjësisë vetëm skuadra. Unë jam njeri që e kam një emër, kam ndërgjegje dhe kam ndjeshmëri për punën që bëj. Mendoj se në një rast si ky duhej të merrja përgjegjësitë që më takojnë.
A keni kontaktuar me Gjicin pas ndeshjes?
Po, pata një bisedë me të dhe ia shpjegova me qetësi se përse e mora këtë vendim.
Çfarë ju tha ai?
Më kërkoi të mos ngutesha sepse në futboll ka edhe situata si kjo, por unë e mendova kështu. Madje, edhe tani që po flasim bashkë, jam i bindur se kjo ishte rruga e duhur.
