Kryeministri Edi Rama ka shuar heshtjen, ndërsa ka shprehur qëndrimin e tij në lidhje me vdekjen tragjike të një të riu. Bëhet fjalë për rastin e të riut Lear Kurti, i cili ndërroi jetë pasi u shoqërua në komisariat.
Nga Shirgjan i Elbasanit, ku po zhvillon një takim me fermerë dhe blegtorë të zonës, kreu i qeverisë u shpreh se policia është sjellë në mënyrën më korrekte, dhe ka pezulluar tre efektivët e patrullës ndërkohë që bëhen hetimet.
“Kanë që dje që akuzojnë policinë se ka vrarë një djalë të ri. Ndërkohë që në mënyrën më korrekte, serioze, dinjitoze, ka pezulluar personat që të mos jenë të përfshirë në asnjë lloj procesi…
Është mjekësia ligjore që bën punën e vet. Nuk ka asnjë arsye që të ketë pasur arsye nga jashtë, të ketë qenë gjë e bërë me të keq. Të gjithë presim autopsinë, raportin mjeko-ligjor e me radhë.
Çfarë qeniesh janë këta që u dalin njerëzve si gogolë në ekrane…?! E vrau policia sepse duan ta lidhin në psikologjinë e njerëzve me atë tmerrin e madh që ishte, të të ndjerit Klodian Rasha dhe duan të nxjerrin njerëzit rrugëve”, tha kryeministri Rama nga Elbasani.
