Kryebashkiaku i Londrës, Sadiq Khan ka bërë me dije se kanë humbur jetën dhjetë punëtorë të transportit publik, të cilët ishin prekur nga koronavirusi.
Khan ngriti shqetësimin se ata mund të kenë infektuar dhjetëra persona të tjerë më të cilët kanë pasur kontakt, në mjetet e transportit publik.
“Ata janë në mendimet dhe lutjet e mia dhe shpreh ngushëllimet e mia për familjet e tyre. Ne kemi 25,000 shoferë autobusësh, më shumë se 25,000 njerëz që punojnë për transportin në Londër, duke bërë çmos që të mbajnë transportin publik hapur për ata që kanë nevojë për t’i marrë nga shtëpia në punë”, tha kryebashkiaku i Londrës.
Më tej, ai deklaroi se punëtorët e transportit publik në Londër aktualisht nuk janë pajisur me pajisje mbrojtëse personale (PPE), të tilla si maska dhe doreza.
Më shumë se 47 mijë raste infektimi janë regjistruar nga koronavirusi në Mbretërinë e Bashkuar, ndërsa 4,934 persona kanë ndërruar jetë.
