Kandidati për kryetari i Partisë Demokratike, Agron Shehaj ka reaguar për herë të parë pasi humbi zgjedhjet e zhvilluara për kreun e kësaj force politike, ku fitues u shpall Lulzim Basha.
Përmes një postimi në rrjetet sociale, Shehaj shprehu falenderimin për demokratët të cilët e votuan, si dhe mirënjohjen për ata që e mbështetën.
Shehaj tha se mbrëmjen e sotme do të jetë i ftuar në emisionin ”Opinion”, ku do të flasë në lidhje me fushatën e zhvilluar në këto tre javë, dhe për procesin zgjedhor brenda partisë.
”Ju falenderoj me gjithë zemër të gjithë ju demokratëve që më votuat. Ju jam mirënjohës juve dhe gjithë qytetarëve që më besuan dhe më mbështetën për të sjellë një frymë dhe qasje të re në politikë. Ndihem pafund mirënjohës ndaj vëzhguesve dhe ekipit që punoi me mua këto tre javë. Më ndiqni sot në Opinion, 22.00!”, shkruan Shehaj në rrjetin social, Facebook.
Demokratët votuan Lulzim Bashën për të udhëhequr PD-në edhe për 4 vitet e ardhshme. Basha është më i votuari ndër 3 kandidatët e tjerë që e sfiduan për të drejtuar partinë më të madhe në opozitë. Ai ka siguruar mandatin e tretë në krye të partisë së dytë më të madhe në vend, me rreth 81% të votave.
Basha mori 81% të votave ose 32.882 në total në të gjithë vendin. Pas tij më shumë vota grumbulloi Agron Shehaj, 6038 vota. Edit Harxhi mori 991 vota, ndërsa Fatbardh Kadilli 763 vota. Në total në të gjithë degët e PD-së votuan 41.095 anëtare ose 54.7% e totalit.
