Mjekët e Shkodrës kanë dhënë mesazhe prekëse për kirurgen e njohur, Zyliha Kraja, që humbi jetën një ditë më parë nga koronavirusi.
Spitali i Shkodrës ka dalë në një deklaratë në emër të të gjithë mjekëve. Mjeku Shpëtim Ymeri është shprehur se pavarësisht përpjekjeve të tyre për gati 1 muaj, ata nuk mundën ta shpëtonin.
“Mendoja dhe besoj se do të shtrëngoja dorën siç bëja gjatë këtyre ditëve që ishe e shtruar në spital, të thosha ia hodhe mikja ime dhe të vazhdonim sërish punën. Jeta është e tillë. Ne nuk mundëm të të shpëtonim pavarësisht përpjekjeve tona maksimale prej rreth një muaj. Është humbje e madhe për familjen, miqtë dhe kolegët”, tha ai.
Zyliha Kraja ishte një kirurge e shkollës së vjetër në Shkodër, e cila për vite me radhë ka kontribuar në fushën e mjekësisë. Ajo u nda nga jeta ditën e premte në moshën 80-vjeçare.
