Ndonëse Admir Murataj u vra më 9 prill në Rinas, çështja e tij te Krimet e Rënda nuk është pushuar. Gjykata sot ka shtyrë seancën dhe ka refuzuar të pushojë çështjen ndaj Muratajt, lidhur me grabitjen e blindave në shkurt të 2017-ës, i akuzuar si i përfshirë dhe një nga grabitësit.
Vendimi në fjalë ka ardhur pasi mjekësia ligjore nuk ka paraqitur në gykatë ende ekspertizën e vdekjes, dhe se në gjenden civile të Tropojës, Admir Murataj nuk është çregjistruar ende.
Në të tilla kushte, seanca është shtyrë, dhe gjykata la afat deri në 14 maj, për të vërtetuar që personi që mbeti i vrarë më 9 prill është Admir Murataj.
Në një kohë që vdekja e Muratajt është diskutuar gjatë në opinionin publik, duket se ajo nuk është konfirmuar ende ligjërisht.
