Ajo që ishte paralajmëruar dhe kërkuar nga disa nga figurat politik u bë e mundur sot nga Presidenti i Republikës Ilir Meta, ai nderoi ditën e sotme Agur Vrenozin me “Dekoratën e Artë të Shqiponjës”. Ky i fundit humbi jetën një ditë pasi u qëllua nga grabitësit në një pikë të këmbimi valutorë në qytetin e Fierit.
Parlamenti e nisi seancën plenare me një minutë heshtje duke nderuar 53-vjeçarin i cili vetësakrifikoi vetën duke ndihmuar mikun e tij.
Presidenti i Republikës, Ilir Meta i akordoi sot 5 mars 2018, me numër dekreti 10736 Agur Vrenozit (pas vdekjes) “Dekoratën e Artë të Shqiponjës” për aktin e tij vetmohues në mbrojtje të jetës së bashkëqytetarëve; për veprimin heroik e sublim, frymëzues për mbarë shoqërinë për të reaguar në përballjen me dhunën, krimin e rrezikun për jetën, paqen sociale, pronën e sigurinë qytetare.
Vrenozi mori një plumb në kokë gjatë grabitjes që Lulzim Demiraj së bashku me Zini Fyraj dhe Dashamir Gergalin kryen në një pikë këmbimi valutor në qytet.
