Ministrja e Shëndetësisë, Ogerta Manastirliu ka treguar se si paraqitet gjendja shëndetësore e Ramë Lalës dhe dy të plagosurve të tjerë që u transportuan për mjekim jashtë vendit, Marlin Shkodrës dhe Albert Carës.
Manastirliu tha për “News24” se Ramë Lala, i vetmi i mbijetuar nga familja Lala në Durrës që u nxorën të pajetë nga rrënojat, ndodhet në gjendje të mirë shëndetësore.
Sipas saj, 17-vjeçari i është nënshtruar një ndërhyrjeje kirurgjikale dhe i duhet kohë për t’u rikuperuar, por theksoi se gjendja e tij është stabilizuar.
“Ramë Lala është shumë mirë, ka superuar çdo lloj rreziku. Kam marrë informacion të përditshëm, gjendja e tij është e stabilizuar. Ka bërë një ndërhyrje kirurgjikale dhe duhet kohë për t’u rikuperuar. Gjendja e djalit është nën monitorim. Nuk kemi pasur rast tjetër të komplikuar për ta çuar jashtë”, tha ministrja.
E pyetur për numrin e të plagosurve që ndodhen jashtë vendit, Manastirliu tha: “Janë 3, Ramë Lala, Marlin Shkodra, Albert Cara. Të tre janë në gjendje shëndetësore të mirë, këta dy të fundit janë në terapi. Ne po marrim informacione, kam qenë në komunikim direkt edhe për këta dy të fundit. Derisa të bëhen mirë, nuk mund të kthehen”.
