Gazetari Artan Hoxha tha sot se Saimir Tahiri do të qëndrojë larg dyerve të gjykatës edhe 3 muaj të tjerë. I ftuar në rubrikën “Opinion”, Hoxha tha se shtyrja e afatit të hetimit për Tahirin do ta mbaj atë larg dyerve të gjykatës dhe për tre muaj të tjerë deri sa prokuroria të bëj gati dosjen. Gazetari sqaroi se pas gjashtë muajsh nuk është më kompetencë e prokurorisë që të shtyje hetimet por duhet një vendim i gjykatës nëse hetimet për Tahirin duhet të vazhdojnë apo jo.
Gjithashtu, Hoxha sqaroi edhe arsyet se përse prokuroria kërkoi zgjatjen e hetimeve për Tahirin.
“Vendim kur skadon afati tre mujor për hetimin e kësaj çështjeje. Dosja Habilaj do të shtyhet edhe për tre muaj. në fund të tre mujorit prokuroria nuk mund të zgjasë më hetimin por duhet t’i kërkojë gjykatës nëse dihet të zgjatet më apo jo. Prokuroria ka kërkuar zgjatje duke thënë për shkak te hetimeve. Është kërkuar ekspertime kompjuterike për disa mjete komunikimi, si në Viber dhe WhatsApp etj. Organizimi i hetimeve dhe përgjimeve nga tabulatet dhe intervistomi i personave por dhe hetimi i pasurisë së personave të hetuar. Duhet thënë se as mbrojtja e Tahirit nuk e ka ankimuar kërkesën e prokurorisë.”
Ndërkohë sot paradite, prokurorja e Përgjithshme Arta Marku priti paraditen e sotme kreun e Prokurorisë së Krimeve të Rënda, Besim Hajdarmataj, duke i siguruar këtij të fundit mbështetjen për vazhdimin e hetimeve për çdo çështje e në çdo nivel, kundër krimit dhe korrupsionit.
Hajdarmataj është prokurori i dosjes së bujshme në ngarkim të ish-ministrit të Brendshëm Saimir Tahiri, i cili akuzohet se është i përfshirë në trafik droge.
Ndërkohë, Prokuroria e Krimeve të Rënda ka zgjatur afatin për veprime të mëtejshme hetimore ndaj ish-ministrit të Brendshëm Saimir Tahiri, konkretisht edhe me 3 muaj.
Njoftimi i plotë
Prokurori i Përgjithshëm, znj.Arta Marku mbështet tërësisht Prokurorinë e Krimeve të Rënda
Prokurori i Përgjishthëm, znj.Arta Marku mbështet hetimet tërësore të Prokurorisë së Krimeve të Rënda për çdo çështje e në çdo nivel, kundër krimit dhe korrupsionit.
Zonja Marku ia dha mbështetjen kreut të Prokurorisë së Krimeve të Rënda, Besim Hajdarmataj kur e priti në Prokurorinë e Përgjithshme paraditen e së hënës, 22 janar 2018.
Prokurori i Përgjithshëm, znj.Arta Marku kërkon që Prokuroria e Krimeve të Rënda të vazhdojë pa hezitim dhe vendosmërisht punën dhe hetimet e filluara.
Kryeprokurorja znj.Marku garantoi bashkëpunim për hetime të vazhdueshme të çështjeve nga Prokuroria e Krimeve të Rënda ndaj kujtdo që shkel ligjin.
Prokuroria e Përgjithshme rithekson mbështetjen e nevojshme për çdo çështje, me çdo mjet dhe në çdo kohë, për të çuar përpara hetimet.
Prokuroria e Përgjithshme vë në dispozicion të Prokurorisë për Krimet e Rënda të gjitha burimet njerëzore dhe infrastrukturore për kryerjen me sukses të detyrave përputhshmërisht me ligjin.
