I dërguari i posaçëm i presidentit Trump, për Kosovën, Richard Grenell, ka reaguar pas vendimit të kryeministrit Hoti për të anuluar takimin në Shtëpinë e Bardhë.
Përmes një postimi në Twitter, Grenell thotë se e kupton vendimin e marrë nga kreu i qeverisë së Kosovës, teksa thekson se pret të vendosë një datë tjetër.
“Faleminderit Kryeministër. Ne e kuptojmë vendimin tuaj dhe presim të vendosim një datë tjetër takimi së shpejti”, shkruan Grenell
Kujtojmë se kryeministri Avdullah Hoti anuloi takimin që do të mbahej të shtunën, për shkak të aktakuzave të ngritura nga Gjykata e Hagës për presidentin Hashim Thaçi dhe Kadri Veselin.
“Për shkak të zhvillimeve të fundit në Prishtinë si rezultat i akuzës së ngritur nga Zyra e Prokurorit Special, më duhet të kthehem në vendin tim për t’u impenjuar mbi situatën. E informoj ambasadorin Grenell se nuk mund të jem në takimin e 27 Qershorit në Shtëpinë Bardhë”, tha Hoti.
