Me anë të pamjeve me zë e figurë, mbrëmjen e djeshme u zbulua skandali se si fermerët shqiptarë përdornin stimulantë dhe hormone për pjekjen para kohe të fruta-perimeve në zonën e Muzeqesë. Këtë problematikë e ngriti mbrëmë emisioni investigativ ‘Fiks Fare’. Po sot, një reagim ka ardhur nga Ministria e Bujqësisë, duke bërë me dije se produktet shqiptare janë të certifikuara nga vendet e Bashkimit Europian ku eksportohen.
Dhimo Kote, zëvendës ministër i Bujqësisë thotë për ‘Top Channel’ se frutat dhe perimet e prodhuara në Shqipëri, nuk dalin përpara sezonit të rajonit, dhe se i njëjti produkt është i destinuar edhe për konsumin e brendshëm.
Gjithsesi pranohen se janë zbuluar raste të përdorimit të tepruar të stimulantëve dhe hormoneve, por nuk jemi në gjendje alarmi.
Z. Kote thotë se ky proces funksionon kështu edhe në vendet e BE, dhe se përdorimi më i zakonshëm i kimikateve lidhet me mos përdorimin e bletëve për pjalmimin e luleve.
