Familjarë, miq dhe kolegë i dhanë lamtumirën e fundit ish-Presidentit Bujar Nishani, i cili u nda nga jeta më 28 Maj. Në ambientet e Presidencës u zhvilluan homazhet për ish-Kreun e Shtetit, ku kanë marrë pjesë shumë figura të njohura të politikës.
Edhe ambasadorja e SHBA në Tiranë, Yuri Kim, zhvilloi homazhe në nder të ish-Presidentit të ndjerë Bujar Nishani. Yuri Kim ka vendosur një kurorë me lule në arkivolin e ish-Presidentit Nishani. Gjatë zhvillimit të homazheve, u pa që ambasadorja u ndal në një bisedë të shkurtër me familjarët e ish-Presidentit.
Presidentja e Kosovës, Vjosa Osmani, është pritur nga homologu i saj shqiptar Ilir Meta, i cili e ka shoqëruar atë nga ambientet e jashtme drejt sallës “Skënderbeu”. Pasi ka nderuar ish-Presidentin, Vjosa Osmani është takuar me familjarët e tij duke i shprehur ngushëllime për humbjen e njeriut të afërt.
Tre ish-presidentët e Shqipërisë, Alfred Moisiu, Rexhep Meidani dhe Bamir Topi, të shoqëruar dhe nga ish-presidenti i Kosovës Fatmir Sejdiu ishin prezentë në homazhet në Presidencë.
Pas zhvillimit të homazheve ish-Presidentët vlerësuan përmes një deklarate për media figurën e ish-Presidentit Nishani dhe shprehën ngushëllimet e tyre për familjen për këtë humbje të madhe.
Alfred Moisiu: Ka luftuar për të zbatuar Kushtetutën. Më vjen keq për këtë ndarje të parakoshme që ka kontribuar për vendin tonë.
Bamir Topi: Është një ditë e trishtuar, kur largohet në një moshë kaq të re duke i lënë një hidhërim familjes dhe të gjithë të tjerëve. Nishanin e kam njohur 22 vite më parë. Ai la mbrapa një vepër mjaft komplekse, pasi ka qenë kryetar shteti, dhe poste të larta ministrore. Është dita për t’i dhënë lamtumirën, i lehtë qoftë dheu. U preftë në paqe.
Fatmir Sejdiu: Unë dua të them që është një humbje e madhe jo vetëm për familjen, por dhe për shtetin shqiptar, të një personaliteti që ka bërë epokën e vetë. E ka sjellë koha në rrethana politike të caktuara dhe ka bërë punën më të mirë të mundshme.
