Në orën 11:00, Partia Demokratike ka zhvilluar homazhe në Memorialin e Azem Hajdarit, duke e përkujtuar këtë të fundit, 19 vjet pas vrasjes.
Gjatë homazheve, ka folur kreu i PD-së Basha, Sali Berisha dhe vajza e Azemit, Rudina Hajdari, tashme deputete e PD-së.
Ish-kryetari i PD-së, Sali Berisha tha se Azem Hajdari është frymëzim për PD-në që të ngrihet dhe të vazhdojë betejën për një Shqipëri më të mirë.
“Sot për ne është një ditë që ne kujtojmë me dhimbje të madhe aktin barbar të kryer nga regjimi, ekzekutimin para selisë të PD-së të tribunit të lirsë, Azem Hajdarit, njeriut që ka bërë si individ më shumë se kushdo tjetër për lirinë e shqiptarëve. Ishte gjoksi i tij që ngrihej në 8 dhjetor në rrugët e Tiranës përballë barrikadave, autoblindave, batalioneve të policisë, ushtrisë që solli çeljen e dyerve bashkë me studentë të tjerë të lirisë për shqiptarët. Por, Azem Hajdari nuk është vetëm një lider i historisë, Azem Hajdari është një burim i madh frymëzimi për çdo shqiptar, për çdo të ri, për çdo të re. Frymëzimi i tij është të qëndrojmë të pamposhtur, është të ngrihemi dhe të vazhdojmë betejën. Dhe sot më të vendosur se kurrë për idealet për të cilat ai dha jetën e tij.
Dhe njëherë thirrja ime, le të na frymëzojë guximi, vizioni, trimëria e tribunit tonë legjendar për të realizuar sa më shpejt, sa më të vendosur idealet për të cilat ai ra. Kam besim se ne do t’ia dalim, i përjetshëm kujtimi i Azem Hajdarit, tribunit të lirisë së shqiptarëve”, përfundoi Berisha.
Edhe Rudina Hajdari, vajza e liderit historik ka folur para të pranishmëve. E emocionuar, Hajdari tha se tashmë ajo është deputete e PD-së, dhe kjo me siguri që ka qenë një nga dëshirat e të atit.
Ajo dha edhe një mesazh për PD-në, teksa bëri thirrje për t’u bashkuar dhe për ta çuar Shqipërinë përpara:
“Megjithëse kanë kaluar 19 vjet, ne jemi akoma më të bashkuar që të çojmë PD-në përpara. Më falni sepse siç e shikoni unë jam e emocionuar. Unë sot do flas si deputete e PD-së, kjo ishte një koincidencë, por besoj se është edhe dëshira e atij , ju siguroj se do jem një zë i fortë i opozitës shqiptare, do mbroj interesat e kombit tonë, prandaj të bashkohemi sot. Le të jetë kujtim i itij shtysë për t’u bashkuar dhe për ta çuar Shqipërinë përpara.”
Gjatë fjalës së tij, Basha tha se Partia Demorkatike do të luftojë krimin dhe drogën, duke nderuar çdo ditë liderin historik.
“Jemi mbledhur sot për të përkujtuar të paharrueshmin Azem Hajdarin. Vij këtu jo thjesht për të nderuar e për të ndarë së bashku dramën e 12 shtatorit, por vij për të nderuar mirënjohjen ndaj Azem Hajdarit, luftën pa kompromis ndaj krimit dhe drogës në pushtet.
Mirënjohja dhe sensi i kurajës do të na bashkojë përjetë edhe atëherë kur beteja si kjo na presin përpara. Vij këtu, për të zotuar se kurrë më nuk do pranojmë një diktature të re, të krimit dhe të drogës. Liria dhe demokracia janë vlerat tona. Duke luftuar ndërojme përditë Azem Hajdarin, i paharruar qoftë kujtimi i tij,” tha Basha./ Tirana Today
