Pasi humbi betejën e tij me një sëmundje të rëndë, sot në Kuvend janë mbajtur homazhet në nder të shkrimtarit të njohur Bardhyl Londo. Familjarët, kolegë, miq të tij politikanë dhe jo vetëm, nderuan sot kujtimin e Londos. Bardhyl Londo prej 2 muajsh ishte i shtruar në spitalin Onokologjik në Tiranë. Gjendja shëndetësore e Bardhyl Londos ishte përkeqësuar shumë, prej 10 ditësh ndodhej në reanimacionin e Onkologjikut në Tiranë.
Presidenti Meta i është bashkuar homazheve për shkrimtarin Bardhyl Londo. Meta u shpreh se Londo ishte një intelektual i përmasave të larta, ndërsa shtoi se ka lënë pas një trashëgimi frymëzuese, për të gjithë dhe sidomos për të rinjtë.
“Ishte detyrim për ti dhënë lamtumirën e fundit sot një intelektuali dhe patrioti si Bardhyl Londo. Jam i sigurt që një poet i këtyre përmasave, ka lënë një trashëgimi frymëzuese, për të gjithë dhe sidomos për të rinjtë. Ai gjithmonë ka qenë mbi politikën dhe ka qenë gjithmonë një intelektual i moderuar për të bashkuar dhe për të nxitur dialogun”, tha presidenti.
Ministrja e Kulturës, Elva Margariti, tha se nuk e prisnin këtë lamtumirë, dhe se pak kohë më parë ai ishte nderuar me çmimin ‘poeti më i mirë i vitit’.
“Pak kohë më parë e kujtuam Bardhylin, e duartrokitëm me çmimin si poeti më i mirë i vitit. Se patëm aty mes nesh, pasi e dinim se nuk ishte mirë. Por nuk e dinim se nuk do të ishte më. Është një poet që ka lënë përjetësi me veprën e tij. Ka qenë një politikan që ka sjellë një model qytetari. Ngushëllime për familjen. Kolegia ime, ministrja e Shëndetësisë, më kishte thënë se gjendja e tij ishte përkeqësuar. Por nuk e mendonim”, tha ajo.
Në një rrëfim për mediat, deputeti demokrat Edi Paloka ka vlerësuar figurën e shkrimtarit, ndërsa ka folur edhe për kontributin e tij të çmuar në Partinë Demokratike, pasi ka qenë edhe deputet i kësaj force.
“Është nga ata njerëz që ka lënë vetëm përshtypje pozitive. Ai ishte i mençur, i urtë, dinjitoz. Për çdo njeri pasi ikën, gjejnë fjalët e duhura. Por Bardhi ishte i tillë. Ai reflektonte pozitivitet. Ai ka pasur herë pas here kontakte. Nuk ka qenë aktiv siç ishte në periudhën kur ishte deputet. Për ne Bardhi ishte i rëndësishëm për ne. Personalitetet kanë qenë pranë PD-së. Sot nuk është koha për të folur për këtë. Sot jemi në një ditë të trishtë dhe është humbje e madhe”, tha Paloka.
