Holanda duket se nuk ka ndërmend të heqë dorë nga kërkesa për rikthimin e vizave me Shqipërinë.
Kjo theksohet në një artikull të publikuar në “Nederlandse Omroep Stichting” (NOS), ku jepet alarmi mbi sigurinë e Holandës, për shkak të rritjes së kriminalitetit nga shqiptarët.
Gazeta holandeze shikon si problem kryesor të rritjes së kriminalitetit në Holandë udhëtimin e lirë të shqiptarëve, gjë që mund të çojë në rikthimin e vizave, por kjo është në dorë të Bashkimit Evropian, i cili vendos nëse do e miratojë apo jo kërkesën e Partisë Kristian Demokrate Holandeze.
Artikulli i NOS, përkthyer nga Tirana Today:
Gangsterët shqiptarë po bëhen mjaft të rrezikshëm në Holandë. Ata janë përgjithësisht të përfshirë në krime të organizuara.
Në vitin 2015, ka pasur rreth 300 incidente me të dyshuar shqiptarë. Një vit më vonë, numri u rrit në 1000. Këto shifra janë publikuar nga policia e Amsterdamit dhe e Roterdamit, si dhe nga Qendra Rajonale e Informacionit dhe Ekspertizës (RIEC) në Amsterdam.
Kreu i Roterdamit, Frank Paauw sapo është kthyer nga një vizitë në Shqipëri. Atje ishte me Kryebashkiakun Ahmed Aboutaleb, Shefin e Drejtësisë Marc van Nimwegen. Ata ishin atje për të biseduar me ministrin e brendshëm shqiptar dhe kreun e policisë, ku në fokus ishin temat: refugjatët dhe krimi i organizuar.
DY GRUPE:
Sipas Paauw, janë dy grupe kriminale të shqiptarëve që veprojnë në Holandë. Këta janë persona që tentojnë të kalojnë njerëz në mënyrë të paligjshme në Mbretërinë e Bashkuar. Para kësaj, ata fshihen në rimorkio kamionësh në tragete.
Ky mision nuk funksionon gjithmonë, pasi rreth 700 prej tyre janë kapur në vit duke tentuar të kalojnë kufirin ilegalisht.
Por, me grupin e dytë policia ka më shumë “barrë”, teksa këtu përfshihen kriminelë të organizuar, veçanërisht në Roterdam dhe Amsterdam. Grupi përfshin aktivitete kriminale, si trafikimi i drogës, pastrimi i parave dhe trafikimi i qenieve njerëzore.
Shefi i policisë në Roterdam, Paauw tha: “Trafikimi i kokainës dhe trafikimi i qenieve njerëzore është biznesi i tyre kryesor dhe ata luajnë një rol gjithnjë e më të rëndësishëm në punën me grupet e etnive të tjera. Kriminelët shqiptarë janë grup në rritje në trafikun e drogës në Holandë, brenda dhe jashtë Evropës”.
Sipas tij, kriminelët shqiptarë janë në gjendje të blejnë dhe të importojnë sasi të mëdha droge nga Amerika e Jugut. Më pas, ata e sjellin brenda nëpërmjet portit të Roterdamit dhe më pas e shpërndajnë drogën për blerës në Holandë, por edhe në pjesën tjetër të Evropës.
Udhëtimi i lirë
Numri i shqiptarëve të regjistruar në Holandë është i ulët, rreth 800.
Por, autoritetet holandeze dyshojnë se ky numër është shumë më i madh, pasi vetëm numri i të dyshuarve shqiptarë në Holandë rezulton të jetë sa ai i banorëve të regjistruar shqiptarë.
Shqiptarët mund të udhëtojnë të lirë në Evropë që nga viti 2010. Atyre nuk u duhet të aplikojnë për vizë për një vend brenda zonës Shengen dhe mund të qëndrojnë aty për 3 muaj. Që atëherë, numri i krimeve të kryera nga ta, është rritur, thotë Paauw.
Policia dhe drejtësia në Amsterdam propozuan në gusht që të rifillojnë kërkesat për viza për shqiptarët në mënyrë që të parandalojnë kriminelët shqiptarë nga “rrënjosja në shoqërinë holandeze”.
Partia Kristian Demokrate Holandeze (CDA) propozon t’i raportojë Bashkimit Evropian për kërcënimin e rendit dhe sigurisë publike. Më pas, Bashkimi Evropian do të vendosë pas të ashtuquajturës “procedurë e përgjigjes emergjente” nëse kërkesa për vendosjen e vizave me Shqipërinë do të hyjë përsëri në fuqi./ Përshtati Tirana Today
